G : 作為過來人，你覺得而家出道做歌手容唔容易呢？
E：過來人……我都無走到 (笑)，依家做歌手易咗好多，同時越嚟越多高手出現，而家太容易學到唔同嘅技能啦。我細個嗰個年代，彈到吉他已經好似係一件好勁嘅事，而家好似係人人都識嘅時候，只好學更多嘢增值自己。
G : 有無比較欣賞嘅新人？
E : 近幾年都有好多，PER SE，SERRINI 都有留意，仲有好多都鍾意。另外仲有一隊 BAND 幾鍾意，叫做 A New World If You Can Take It，係一隊好 Heavy 同好型嘅 BAND 嚟。
G : 你細個透過咩途徑咩方法學音樂呢？
E : 離家出走 (笑)，因為阿媽唔俾夾 BAND，我地嗰個年代，佢會覺得「啊！好壞啊，你地夾 BAND」，所以嗰陣時開頭學音樂 ，真係有離家出走過半日，之後終於爭取到個權利去買支吉他，咁就開始咗啦。
G : 第一支好似係電吉他？
E : 我同佢講我買木先嘅，但係就買咗電，反而人大咗鍾意彈木多啲。
G : 知道你已經入紙申請紅館，可以透露多啲消息俾讀者知嗎？
E : 要問返啲紅館姐姐先知，希望可以喺 2022 年入秋嘅時候啦。
G : 早前喺泰國休養期間有冇學到咩新技能？
E : 整冬蔭功
G : 冬蔭功湯？難怪你午餐都係食冬蔭功
E : 有小小掛住啲冬蔭功味 (笑)
G : 喺泰國創作同喺香港創作，嗰環境上面會唔會令你寫歌有咩唔同？
E : 都係廁所多嘅……唔係，喺房寫歌多嘅 (笑)，點講呢……可能關季節事，夏天寫嘅歌同冬天寫嘅歌個 Feel 唔係好一樣。
G : 嚟緊新歌會似返以前 2004 年出嘅歌？
E : 其實唔一定，而家越搞越複雜。習慣咗想每首歌嘅旋律都盡量豐富，而家反而要學點樣去搞到首歌唔好太豐富，希望做到 Less is more。
G : 之前憑著《一秒拳王》，成為香港電影導演會「最佳男主角」，而家向電影圈進發，有無咩角色想挑戰？
E : 最緊要係劇本，想嘗試一啲內心世界複雜，可能真係有缺憾，或者人格分裂嗰啲角色。
G : 有無邊啲角色好抗拒，一定唔會試？
E : 驚慄電影，或者關鬼……靈界嗰啲就唔得，可能我比較敏感體質，但係喪屍同末日災難片都OK。
G : 你啲戲路好廣，同埋接受能力都好高，之前睇過你嗰訪問有提過，同性嗰題材都想會嘗試，咁如果俾你揀一位男演員去合作，你會想同個合作去拍依個同性嘅題材？
E : 髮型同你差唔多嗰啲 (眾人大笑)，呢個髮型好似春光乍洩嗰個。
G : 如果係香港嘅男藝人你會揀邊個？恆仔得唔得呢？
E : 恆仔？我無所謂，你問吓小花得唔得先 (笑)？其實都冇話邊個嘅，我都係睇緣分。
G : 2021 年有無咩遺憾？
E : 啲 Time Management 可以做得好啲，我覺得今年係入行以嚟，算係 TOP3 最忙嘅一年。覺得有啲地方可以唔使咁密，因為去到年底有小小攰。
G : 如果有空餘時間你會想做咩？
E : 而家想行山、出吓海。
G : 如果疫情結束完咗之後會想去邊度旅行？
E : 唔係唔日本啊嘛！想去四國或者北海道，唔去市區………啲阿伯，唉
G : 2022 年有無咩新目標想達成？
E : 希望可以出到一隻 Full Album，可以拍到一部好好嘅電影，可以做到一場好好嘅舞台劇，同埋一個好完美嘅演唱會。
G : 如果二選一嘅話，唱歌同演戲會揀咩？
E : 二選一……其實真係好難揀，喺呢個 moment，我喺舞台上我安全感會大啲。而家仲學緊點樣去做一個演員。
G : 記唔記得自己嘅初心係咩？
E : 當初入行嘅初心，寫歌囉，我到而家都係寫緊歌，所以應該係無忘記到我自己嘅初心，條根依然喺到。唔知大家又記唔記得自己嘅初心係乜嘢呢？
No products in the cart.