有人，有歌，便有樂壇。今次找來兩位獨立音樂人——林一峰與Serrini進行一場對談，分享音樂路上的相知相遇。同樣不走傳統主流路線，專注個人的音樂創作，卻為樂壇帶來意想不到的火花。
林一峰出道二十年，未必是主流樂壇或頒奬禮的常客，但唱而優則作，出自他手的曲詞多不勝數，從琅琅上口的集體回憶經典歌，到風格多元新鮮的小品，盡見創作的自由和廣闊。
Serrini另闢獨特鮮明的形象，詞曲風格強烈又不失細膩，無論音樂作品或衣著打扮，自有一套美學主張，在樂壇上形成另一種耀眼光芒。
今次視像通話，把遠在哥倫比亞的一峰與香港的Serrini連繫上，一夜一晝，在私密坦誠的告白中穿插說笑閒聊，無論是對藝術工作者的自覺，抑或音樂工業生態的評價，他們始終如一地強調，不論環境如何，音樂人只要做好自己的作品，讓作品說話。
倘若最好的尚未來臨，就放心去開發你新的秩序。
明：明周文化
峰：林一峰
S：Serrini
明：兩位是怎樣認識的？可否分享一下當時的情況？
峰：其實我們第一次接觸，是我主動找Serrini，大約五、六年前。我當時做「音樂蜂」（眾籌項目）。
S：我們都是在壽臣（劇場），Arts Centre。
峰：那時候呢，我就覺得這個女仔，有啲嘢喎！便不怕醜地主動找她。「音樂蜂」最終不成功，有點可惜。但我用了那個時間和資源去認識到好多獨立音樂人，我覺得好可貴。就在那時候開始，我留意到Serrini這個人，看到她的歌詞，聽到她的歌。我們經常都text下，但我曾認真跟她說過，中文歌來說，好少人留意到sound。”sound”該怎麼譯呢？博士，譯唔譯到？
S：音色？聲音？
峰：是「聲音特質」吧。好少人在聲音特質上鑽研，但Serrini由頭到尾都有，她自己沒有說過，是我留意到。她是一個很好的音樂人，to begin with。如今六年過去，世界prove到我們的眼光沒錯啦。
藝術工作者要專心創作
明：你們算是不同時期出道，可否談談各自的唱作環境？
S：我personally就不太理人，可能真的是一個好artist類型的人，可能本身性格問題，真的不太去觀察環境，甚至樂壇。我一開始其實是自己在家寫歌，好開心地唱一些好無聊的作品。去到後期無啦啦有一個契機，我都忘記是什麼契機，無啦啦可以去到頒奬禮，或者派台。我知道世界是怎樣運行，但沒跟着它的秩序，都在探索自己的過程。我猜我最不同的，可能就是我是一個digital native，成長過程一路有好多社交媒體，或者可以發布音樂的平台。我一開始已經沒有一個限制，我要有什麼大公司支持，或者我要怎樣才可以出歌。我只是覺得，我有個file便可以upload，亦可以自己主動在網上找網友。
峰：其實這一點我和Serrini真的好似。我哋時代真係……差一陣啦！剛才Serrini有一點說得好，你有首歌，upload就得㗎喇。發表好簡單，所謂大環境，好似我們這類型的……藝術工作者……
S：「藝術工作者」，I love！
峰：如果是先看環境才做呢，我哋死得㗎喇，係唔可以做。我們為何可以行出來，都是專注做自己的事，忽然之間，有個浪，托高你少少，被人知道了，就憑自己修為。如果修為OK，就可以一路行下去。藝術工作者，專心做自己的東西，當潮流一遇到努力的時候，就是契機。我想我和Serrini都是這樣被人認識。
S：對啊。如果一開始好多人聽一峰的作品，一峰幫好多人寫歌，或者現在（我）突然去好多不同event，著得很誇張，並不是因為我們突然之間有什麼改變，而是因為我們一直在做的東西，剛好有人見到。好多人會話紅唔紅，我覺得呢個紅，係define唔到我哋真正能力。他們沒考慮到我們寫了很多曲詞，也有很多對於自己作品的criticism，或者對自己的要求。他們只看到，嘩，點解依家紅埋呢啲唱歌嘅聲，可能男聲太溫柔，女聲太似男人。
峰：還有人這樣說？現在都二○二一年了！
S：係囉！經常都有這類，我不太care。我們都是同一代啦！但一件事的改變或契機，我估未必關我們事。
峰：互聯網令到大家很快得到資訊，形成好多pocket，好多細個細個窿。有一個不好的地方，是發表好容易，但longevity，事業和作品的壽命普遍來說比較短。
S：我反而會想，一個作品是否真的要長壽？係好嘅，一些classical musician的作品有好多人記得。我只是想，Pop 或者自己做音樂時，初衷是自己想和人交流。人數多唔多，夠唔夠，好難量化。尤其見到好似以前自己剛出道年紀的音樂人，可能好鍾意問，或者有frustration，就係：點解你哋唔聽我啲歌？好多音樂人覺得，有錢才可以維繫音樂創作，如果沒錢就做不到。但我們不會說沒錢就做不到，便學習沒有某部分的製作，可能一開始沒錢拍不到MV，咪開始自己拍，或者寫歌整beat，可能好辛苦。也有音樂人問：唔知點樣令到啲人聽我嘅歌？我好怕答這些問題。
峰：這個問題我也常常問自己。我寫每一首歌的時候，都問自己：點解人哋要聽先？好老套的想法是，你想喺呢個世界得到啲嘢時，你offer到啲咩先？剛才你講關於budget的問題呢，我想和大家分享，錢，能夠令到你的藝術作品昇華，但不等如可以令作品有靈魂。靈魂是從我們這裏，（把手放在心前）——corazón而來。用盡你的靈魂創作，接着才想商業的事。這是我做了二十年音樂不斷記住的座右銘。就算不夠budget，唔緊要，多有多做，少有少做，最重要有心。當你做嘅嘢啱嘅時候，啱嘅budget就會出現，好神奇。
S：好似信仰般，大家信呢樣嘢會發生，佢就會發生。現在我們像上一輩跟後輩，哈哈，是對所有人說：你只要相信，就會有希望。
峰：係囉，兜咁大個彎就係呢句！
金毛玲與西裝友的緣份
S：我最近重播，發現原來〈遇見〉是一峰寫歌。
峰：都二十年了！
S：Wow！就是……我沒想過，孫燕姿這麼遠……
峰：唔係好遠，三個半鐘飛機㗎咋其實。
S：而且這首歌是集體回憶！中學十𡃁歲唱K嗰陣唱都會覺得係舊歌嚟㗎嘛，突然覺得⋯⋯Wow！哈哈哈，唔好意思！原來大家細細個已經開始contribute作品，係咪十幾歲就開始寫？
峰：係呀，我十七歲開始寫。我大半生都在做音樂。我做音樂的時間，長過我沒做音樂的時間了。不要說回以前了。一個唱作人最重要是寫得出下一首作品。以前功績幾咁叻又點呢？咩都會過嘅，我哋向前望啦。用作品交流，從作品嘅角度出發，引發話題，令大家覺得有趣，生活冇咁慘淡苦悶。
明：那麼，可否談談對方有哪些作品令你欣賞，或感到深刻？
峰：我對Serrini的作品最深刻，或者最入心，一定是〈油尖旺金毛玲〉。上年這個時候，exactly一年之前，我在緬甸仰光，疫情剛開始，我在家聽到這首歌，聽了三日三夜！Serrini睇番Spotify或Apple music報表呢，可能舊年三月有條友聽咗百幾二百次，就係我喇！哈哈！係忽然hit到我好中嘅一個作品。〈油尖旺金毛玲〉發表時，我不是很識，未有那個緣份去聽。
S：係呀，真係緣份嚟。
峰：流行曲的魔力就是hit到你。醞釀了三日三夜後，我好斗膽去text Serrini，我想寫下集，肯不肯？都幾突然。於是我寫了〈西裝友的心事〉，想像故事本身可以有不同的角度去詮釋。我諗番轉頭，點解hit得咁中，因為perspectives。〈油尖旺金毛玲〉帶出來的是一個perspective，一個從不同角度看事情、看社會、看世界的作品。我由小到大，中學開始，中文老師給我最大的啟發是，要從不同角度、立體去看事情。〈油尖旺金毛玲〉做到這件事之外，還做到很好的sound。我諗，條女唱歌咁勁咁好嘅？講真，我係嗰刻覺得，你係識唱歌喎！
S：嘩，被人讚，誇誇羣，緊張！哈哈。剛才一峰說，音樂要有好長的career，我發覺是在人生不同階段，突然想起一首歌，感覺就會好唔同。可能長大後，或者某一個社會環境，令你好想要一首歌。一峰有首歌，可能這個例子很pop，但我還記得我聽這首歌時不是聽你的版本，反而是at17口中唱的——〈The best is yet to come〉，好像是中學的時候在音樂堂有唱過。
峰：真的嗎？入學校呀？好開心喎！
S：因為是正能量。我特別鍾意啲melody，一峰嘅melody有個shape。
峰：簡單的洗腦？
S：係，有點似公園內小朋友爬的frame，一見到就想爬上去，是這樣的意象。有個實在的frame，重重複複。
峰：哈哈，多謝！
S：這首歌也有個message係——希望。當時是有很多傷心情歌的時代。有一首好似在你身邊陪你傾偈的歌是很特別的。當然，也有很多好的作曲。我成日都係睇作曲，好鍾意聽歌，唔知點形容，係咪叫旋律特徵？哈哈！譬如我喜歡聽classical，某幾個的特質是旋律簡單得來洗腦，退後少少，留點空間。因為聽嗰個都要fill in 一啲嘢，要有啲位俾佢自己諗。我特別鍾意一些sentimental一點、慢一點的。
和自己辯論的火花
峰：講多樣關於Serrini的事。呢個女人真係……你是一個好有條理的精神分裂者。你不停和自己辯論。
S：係呀！哈哈！（掩面大笑）
峰：可能因為呢樣嘢，我被你吸引了。或者我們被大家吸引了。我和Serrini都有個特質，喜歡和自己辯論。我們有很多歌都是和自己辯論完的美麗灰燼。在辯論過程中有很多火花，一部分是，不要再說啦！第二部分是，太精采，唔好出街喇！第三部分是，不要緊，過去了，我現在將灰燼和大家分享。這是否我們相似的位呢？
S：我估相似位是，我們是和自己辯論，不是和監製辯論現在流行聽什麼。不用勉強說似唔似，我覺得夾唔夾。
峰：大家都周身賤格㗎喇，點會無端端同自己辯論吖？
S：哈哈！「周身賤格」！呢個term點嚟？
峰：我被人這樣形容過，我好鍾意呢四隻字，所以我own咗佢。自己鍾意攬嘢上身做，諗埋一邊咁啦，明明冇事都搵嘢做。
S：That’s artist. 作為音樂創作者，就是要令人有些不舒服。不是特別要與別不同或標奇立異。你要做自己的作品，要好consciously，有啲嘢做咗出嚟，你知道有人唔鍾意，但你冇所謂，因為你係特登要令到大家有啲唔舒服。Art是一個intrusion，令人諗嘢突然脫一脫軌的過程。藝術告訴人：You have a way out, like the best is yet to come，或者 the worst is yet to come, and this is OK.
峰：我和Serrini的音樂都是provide options，你自己揀，我們提議不同options，有不同perspectives去看城巿、看世界，whatever，音樂是我們的媒介。你的存在令作品誕生，你的作品誕生就提供了perspectives。
不要追逐樂壇頒奬禮
S：我的作品除了音樂，可能是衣著，或者唔知做乜喺度亂噏。這一年我去了一些頒奬禮，或者記者會，因為我可以著到好誇張坐喺度。我點解想去所謂「主流樂壇」，覺得如果popular media有一個咁嘅人出現，我的童年應該幾唔同，冇咁lonely，或者我係可以做到唔驚被人鬧，講嘢有confidence。細個以為音樂是要簽大公司，或者有某種身體形象，皮膚或者化妝，最好就soft feminine。可能時代有好多不同的東西，我覺得是一個respresentation，一個可見度，只係多啲嘢，冇問題，又唔會損害自己，咪出嚟。
峰：這麼多年來我在香港出席過四次（樂壇頒奬禮）。我的觀察是，其實頒奬典禮是一個需要有前瞻性的指標。你唔可以追住頒奬典禮嚟跑，因為頒奬典禮有時pick up咗一、兩個人，等你知道有呢幾個人存在，然後靠啲人自己嘅修為。如果你一直靠咁嘅奬勵、給予，接受嘅關係，好唔健康。一個好的頒奬禮應該有前瞻性，而歌手可以參與時表示一分支持，參與一下。如果每年都賣咗身咁呢，就好唔抵。
S：我嗰年（二○一九年）去金音獎，諗住成個禮拜每一日都去打邊爐，食到最後嗰日真係肥咗，結果條裙爆爆哋咁！哈哈！
峰：我們談談那四個禁忌大字啦，「樂壇已死」。其實我廿年前已經被人問這個問題，問到現在，廿年之後，我都仲未死。
S：彌留咗好耐。
峰：答案都係：未死。我想這個世界很得意，如何為之一個industry呢？「樂壇」二字其實是music industry。Industry要有足夠資源，足夠收入，令很多人食到飯，才有「工業」出現。如果要這樣比較，跟二十年前我剛開始時，真的不同。弔詭之處是，個form不斷轉變，但音樂被需要的情況是冇變過，兼愈來愈大，只不過收入來源不同了。
每個年代都有辣有唔辣。我覺得最應該戒的就是比較。一代人看另一代人，一定有judgment，一比較就冇得傾偈，咁冇得玩。大家忘記了有樣東西叫轉化。有些能力要流動，不是沒了，是轉化了。視乎你有多眷戀以前的事，有多嚮往之後的事，這個balance是每個人自己的修為。我覺得，人，無論咩時代，咩世界的人，都需要音樂。但點用音樂賺錢，令到生態健康呢？就有待大家去一齊發掘呢個答案。
S：好有權威性的答案呀！你（指記者）可以寫：Serrini表示：沒有意見。哈哈！
鼓勵你想發生的改變
明：那麼，怎樣才為之健康生態呢？
峰：有一段時期，社會常說打擊翻版，我覺得要人俾錢去支持一啲嘢，點解人哋要俾錢先？對佢有咩好處？焦點不應該放在責備，而是教育。知識產權的教育才是最重要，而不是一味鬧人。
S：後期一些人說，歌手唱歌好難聽，詞又不知怎樣……我想照一峰的邏輯，就是作為聽眾都有必要去鼓勵你想發生的改變，支持一些你覺得好聽的作品。當你作出這個評論，或者惡意抨擊，generalization，你為音樂行業或者對音樂有何高見？否則一些不負責任的criticism只會淪為人身攻擊。我有時都覺得這是否一個偽命題，有誰可以好有力量去講「樂壇已死」，要generalize這件事好難，就如「香港是文化沙漠」這句很「偽」，樂壇已死作為一個題引，在promotion或者傳理學角度，用大家好易反對的命題，去帶出你覺得正常或想講的事。
峰：都要提大家，小小一點：好嘢先好支持，唔好為支持而支持。
S：對，你（聽眾）找一些你欣賞的位，你喜歡什麼。
峰：再回到那四隻大字：樂壇……未死！樂壇已死？NO～我好斗膽同大家講，樂壇呢一分鐘死咗，下一分鐘翻生。每一分鐘都係死亡，每一分鐘都係翻生。Move on！
No products in the cart.