如果沒有疫情，林一峰的演唱會在3月尾已經舉行了；如果不用離開，林一峰會選擇留在緬甸，甚至想過在當地定居……但人生沒有如果。
林一峰還是回來了，他這十多年間一直遊走各地，《離開是為了回來》其實不止是歌名，直頭是他的人生主題。
自立後搬過無數次家，由尖沙嘴中環大坑到貝沙灣……訪問這天，他一個人靜靜在油麻地一間藝術酒店已住上數天，林一峰說：「我呢幾年有諗，究竟喺邊度離開？回來係回去邊度呢？其實都係睇心態，我一日爹哋媽咪仲在生，香港都係我離開回來嘅一個地方！」
來來回回，未必更愛香港，總是有愛亦有恨。林一峰這天說，他情如親妹的盧凱彤自兩年前離開，他就為自己立了遺囑，「我有一次同朋友坐的士途中講遺囑，見到個司機喺度冒汗，見到佢唔敢望我哋，我諗香港人仍然比較忌諱，對於死亡。」
遺囑寫好不用正式喪禮，他要綠色殮葬。
撰文：文嘉龍
攝影：仇志德
林一峰說有起有跌的生命才完整，死亡是生命一部份，「你一定要接受呢個事實！」
今年1月林一峰為《重塑九龍》展覽揭幕兼任督導員，林媽媽現身支持。
林一峰11歲的泥膠作品，恐龍家族重現。
最值得記低大家嘅希望
林一峰拿出手機，展示他相片庫內的「珍藏」。因為疫情，這段時間多了在家，意外發現了媽媽一直為自己保存至今的泥膠作品。林一峰笑說：「好感動，開心都嚟唔切，估唔到我做咗個音樂人，唔係做泥膠人！」
他說最犀利的是林媽媽，原封不動將泥膠作品一一珍藏，那時候的林一峰才11歲，「媽咪將佢哋保存得好靚，我睇到真係好感動。」他立即拍下這些兒時大作，今天邊看相片邊回味，「我11歲整咗隻劍龍，細過個兩毫子，係咪好勁，最勁係我媽咪！呢度有個恐龍家族，全部一毫子咁大個，勁！只係最cheap嘅泥膠，我又整咗隻蕉，你睇下啲蘿蔔有紋㗎！我見保存得咁好，我就將佢影咗相做書籤，擺咗落新碟，做special edition（特別版）！」
生活中發生的任何事，幾乎都可以觸動林一峰，將它化成音樂化成靈感再展現出來。
新碟名字叫《Born In Kowloon》。林一峰生於油麻地廣華醫院，在坪石邨長大，這位九龍之子，記錄了逝去的美好回憶，「我都係講返自己成長故事，我講返啟德遊樂場啦、荔園啦，九龍城有機場同冇機場嘅變遷……都係停留喺我思想發育嘅年紀。其實我二十零歲開始已經周圍走，到𠵱家都係過住同樣生活，喺香港時間越來越少，發覺有啲嘢，變得嘅都變！講真，城市變遷，唔變就弊！變，有辣有唔辣，我就記返一啲我覺得值得記低嘅嘢！」
美好年代一去不返，往事只能回味，「我覺得最值得記低，係曾經大家擁有嘅希望，希望係最值得大家記低，而又係最易幻滅！可能我成長喺8、90年代，大家好open-minded，兩文三語都好強能力嘅時候，吸收好多世界各地嘅嘢，變成自己嘅嘢，每一個人都有佢嘅觀點，每一個人都肯聽其他人講嘢嘅時候，呢個希望係最值得留低！」
新碟《Born In Kowloon》盡訴香港舊情，林一峰說：「記低值得記低嘅嘢！」
成長於坪石邨，林一峰2009年與胞妹林二汶，重遊舊地。
我其實已經寫咗遺囑
悲情城市，希望往往變成絕望。林一峰說：「我明白好多時候喺度生活嘅朋友嘅唔開心、壓迫感呢樣嘢！希望係自己搵，你覺得有，就會有！」正能量得過份，但不是嗎？林一峰早就唱過《The Best Is Yet To Come》了，雖然那一首歌，他是為失戀而寫的，但確實愛一個人同愛一個地方，總希望最好的尚未來臨。
「如果一個地方，齋令你開心，或者齋令你唔開心，都唔係好make sense！我哋諗埋呢一個例子，一段關係，齋happy，嗰啲係外遇；齋唔happy，嗰啲係孽緣。有辣有唔辣、有起有跌就係真愛喇！又愛又恨啦，跟住睇點樣相處，呢啲就係真愛。香港都係一個咁嘅地方，有辣有唔辣！」
愛恨香港，林一峰說：「啲樓真係好貴，呢樣真係愛唔落！喺美國側邊嗰啲省，其實有一個島，係可以買一個島㗎，你估下一個島幾多錢，美國喎，係三十萬美金，即係二百零萬港幣，喺香港，買到半個電單車位咋喎！（你已經可以買個島啦？）買完之後食咩呀……我愛嘅就係聰明嘅人，我啲朋友、我啲屋企人！」
2018年，對林一峰來說，是一個打擊。他口中的「阿妹」，盧凱彤因抑鬱症而選擇了跳樓自殺，令林一峰對生死有很深體會，那一年，他立了遺囑。「阿妹盧凱彤去世，其實呢個係一個好大打擊，同時間同一年，我又有另外兩個朋友去世，所以嗰年我開始諗，我其實已經寫咗遺囑。我都同我身邊朋友講，如果我死咗，你哋又未死，你哋想做啲嘢，千祈唔好！我唔想要葬禮，一係大家搵個理由出嚟開開心心着到靚靚，慶祝下生命！如果你哋想對我好，我在生時候對我好就得！我唔想再花好多世界上資源，所以我好贊成綠色殮葬。」
遺囑內容很簡單，「綠色殮葬囉！仲有我有啲copyright邊個處理啦，咪我個妹囉（林二汶）！我個人死咗啫，我啲歌仲喺度㗎嘛，版權收益可以做啲乜呀，可以照顧邊個呀……」說起離開快兩年的盧凱彤，林一峰最難忘與她在台北的一次音樂節，「我哋一齊去一個音樂節，我支結他on show時斷咗線，佢係第一個人喺台邊，攞返起支結他，親自幫我換線！我只可以話，佢係一個真正音樂人，我好感動！」今天說起，林一峰已能放下傷感，他說：「有起有跌嘅生命先係完整，死亡係生命一部份，你一定要接受呢個事實，然之後成為自己一部份！我自己應承過佢（盧）一樣嘢，我活着嘅時候，幫你呼多一口空氣！」
兩年前盧凱彤（左）的離世，對林一峰兩兄妹來說都是很大打擊。
每首歌會有自己條命
一呼一吸，活着多好。林一峰2003年寫下的《The Best Is Yet To Come》，原先是為失戀而作的，但當年碰上沙士，卻成為了打氣歌。「我好多歌成日都俾人咁用！沙士啱啱嗰年入行，戴住口罩都戴咗半年，𠵱家大家警覺性高好多！嗰年我真係一粒豆，又不知天高地厚，二十幾歲啱啱入行唔知發生乜事，寫起《The Best Is Yet To Come》係因為我失戀，點知寫咗出嚟就遇到一個大環境，啱啱需要一個出口！我諗創作人要做嘅嘢，就係唔好諗咁多，老老實實寫低佢先，嗰首歌會有自己條命，如果你諗要達到一個效果而去寫嗰首歌，唔work㗎，事倍功半！你越計算就越唔得，賣唔出，嗱，呢啲就冤枉路喇！」
今時今日，當然不會再為失戀而寫歌，林一峰很大反應：「唔會啦，呢單嘢真係好作狀呀！唔使㗎喇，要寫嗰啲都寫咗，要經歷嗰啲痛苦，搞掂咗喇！」早已出櫃的林一峰，如今與伴侶感情十分穩定，「我不嬲都好穩定，唔使成日見！我感情生活好健康亦都好穩定，所以我可以安心創作，但係錢，我一定要自己照搵！」當年戀愛大過天，「人好得意，有一樣嘢穩定咗之後，就唔使太大㗎喇，反而我諗多咗其他嘢，譬如我要學語言、學拳，我真係要學到識為止！」
林一峰早前到緬甸旅居，除了學打緬甸拳，還學了緬甸話，只學識數目字的發音初階，就要回港了。他意想不到，當地人很愛聽一些台灣舊歌，「我喺緬甸聽到收音機播中文歌，我第一首聽到嘅歌係杜德偉《無心傷害》，原來緬甸流行樂壇，係鍾意聽台灣舊歌；我又聽到《愛我別走》（原唱張震嶽）緬甸版、聽到楊千嬅《處處吻》緬甸版，陳慧琳有啲快歌都變咗緬甸版，佢哋停留咗喺華語樂壇二十年前個世紀，好得意呢樣嘢！」
聽緬甸歌，又成為林一峰的創作靈感，「我搵一啲新歌聽，嘩，聽到我流淚，好感動！有一首歌講賣花嘅小朋友，大家如果去泰國，會有啲賣花好細個嘅小朋友，有一首係緬甸嘅唱作人寫返嗰個職業。我學咗一個月呢首歌，我好想演繹，用緬甸文演繹兼寫個中文版，我識唱個音，啲字未得！」即場唱了兩句的他說：「係咪幾好聽呀？我學咗一個月就要返香港喇！我會努力，我希望可以對得住嗰個語言先至創作！」
如果真的離開，那一首歌是自己的離別曲呢？「我唔想要一個正式喪禮，其實墓碑都唔使，大家在心中，在生時候對我好啲！我兩年前開始諗，《離開是為了回來》就係搞gag啫，都死咗咯，又唔可以最好的尚未來臨，唔通《今天應該很高興》咩，梗係唔得啦！」答案是：「就係《簡單不簡單》，我歌詞好簡單，就係『簡單的生活，從不簡單』，我希望大家，無論點都好，我留低嘅創作，有佢嘅生命力，我已經好滿足！」44歲的林一峰說。
林一峰與結他，自細已形影不離，一支結他一把聲記錄人生。
【後記】打四圈
44歲，人到中年，仍然一臉童顏的林一峰說，他有很多當年聽《The Best Is Yet To Come》或《離開是為了回來》的歌迷，當中有不少都告訴他，要結婚了，有些更有兒有女。林一峰2003年出道，「仲選擇留喺唱歌界，淨係得我同鄭融咋喎！」歲月無情。 17年來，人來人往，林一峰雖然一直做遊子周圍飛，但近年生活變得十分規律，「我朝頭早7點起身，夜晚11點瞓，中間時候，我就處理晒我要處理嘅嘢。」可以的話，麻雀不可少，「最好一個禮拜畀我打到四圈，廣東牌，我唔打台牌，四圈好快，兩個鐘！我唔會畀自己泥足深陷，我知道打台牌嘅朋友，有幾咁addicted（上癮）！廣東牌適可而止。（打幾大？）打幾廿蚊上落，攞個意頭㗎咋！」
No products in the cart.