愛妻號發功!張繼聰街頭唱情歌冧暈謝安琪

https://hk.on.cc/hk/bkn/cnt/entertainment/20190215/bkn-20190215103835023-0215_00862_001.html

尋日適逢情人節,圈中「愛妻號」藝人張繼聰為太太謝安琪(Kay)製造咗一個好難忘嘅浪漫禮物,睇到粉絲好葡萄!事緣張繼聰尋晚突襲尖沙咀海旁,佢問喺海旁嘅年輕人借咗把結他,即興自彈自唱張學友首《每天愛你多一些》冧老婆,當鏡頭影到Kay時,Kay成副冧樣出晒嚟,畫面好有愛。張繼聰留言:「老婆話唔要d(啲)物質禮物,但係要難忘嘅冧豬嘅幾十年後都記得嘅🍃 於是我帶佢去海旁,問班年輕人借咗d(啲)架生…」張繼聰話要多謝班借樂器畀佢嘅年輕人,更向Kay表白話要「每天愛你多一些」,兩公婆恩愛到暈。

原來突擊獻唱之前仲有段小插曲,張繼聰透露喺海旁偶遇周國賢夫婦,而周國賢除咗幫張繼聰拍片之外,都有份拎起結他一齊獻唱,圍觀嘅粉絲當堂起哄尖叫。喺條街偶遇兩位唱得之人,仲有得聽免費騷,運氣好到令人羨慕呀!

除此之外,張繼聰仲上載咗張咀嘴囡囡嘅相,留言祝大家情人節快樂,更表示張相係激嬲老婆系列添!冧完今世情人,又冇冷落到前世情人,真係好周到~

東網聯絡上張繼聰,佢表示呢個情人節驚喜並唔係預先安排,而真係路過即興決定:「冇安排㗎,其實都好驚青,不過人一世物一世,為咗氹吓太太,膽粗粗試吓。同埋人愈大愈懶愈無膽,好多嘢第時可能真係唔會或者唔敢做,但係又好想令佢笑吓,所以癲一次。」

Close

Cart (0)

Cart is empty No products in the cart.